A Escola de Música de Poio conta cun abano de agrupacións pensadas para fomentar a aprendizaxe en conxunto, adaptadas ás necesidades e idades do noso alumnado:
Combo Orff (4-6 anos)
Baséase na metodoloxía do musicólogo Carl Orff, orientada a introducir aos máis pequenos na interpretación musical de maneira lúdica, a través do xogo, da rítmica e da experimentación con diferentes instrumentos.
Coro (a partir de 7 anos)
Un espazo onde desenvolver a voz e aprender a concertar en grupo, gañando confianza e dominio con melodías de varios estilos. O Coro permite descubrir o poder da voz como instrumento colectivo.
Combo Moderno (a partir de 7 anos)
Enfocado a estilos musicais contemporáneos (pop, rock, blues…). Ofrece ao alumnado a posibilidade de afondar na interpretación conxunta, explorar a improvisación e familiarizarse cos recursos propios da música moderna.
Pequebanda(a partir de 7 anos)
Dirixida a estudantes que están nos seus primeiros anos de estudo de instrumento (vento ou percusión). Desde as primeiras semanas, participan en ensaios conxuntos para adquirir experiencia en grupo e prepararse de cara á Banda de Música de Poio.
Banda de Música de Poio (a partir de 8 anos)
A nosa agrupación máis emblemática, formada por músicos de idades diversas. O seu repertorio abrangue tanto pezas clásicas e tradicionais como composicións actuais, destacando polo seu carácter integrador e pola ilusión compartida de facer música en comunidade.